Asaan dill vichoon dunya bhulai

اساں دل وچوں دنیا بھلائی جدوں دا سوہنا یار ویکھیا

کدی کسے ول اکھ نئیں اٹھائی جدوں دا سوہنا یار ویکھیا

میں رانجھن دی رانجھن میرا،سب تو سوہنا ساجن میرا

دیندی پھرنی آں جگ تے دہائی جدوں دا سوہنا یار ویکھیا

سب کجھ پی دا،سب کجھ پی اے،پی دے باہجوں جگ وچ کیہ اے

تاہیوں پی دےنانویں ہر شے میں لائی جدوں دا سوہنا یار ویکھیا

عشق دا بھانبڑ سینے مچدا،اہدے باہجوں کجھ نئیں جچدا

لوکی کہن مینوں کملا سودائی جدوں دا سوہنا یار ویکھیا

شالا ہو جائے ماہی راضی،جت جاواں میں عشق دی بازی

ایہو غم میری جند جاوے کھائی جدوں دا سوہنا یار ویکھیا

مقترؔ چمکے لیکھ جے تیرا، ماہی تینوں کہہ دئے میرا

ایہو چاء پھراں دل چ لکائی جدوں دا سوہنا یار ویکھیا

(ماخوذ۔عزیز جاں، از حضرت الحاج حکیم پیر لجپال صوفی محمد شفیع مقترؔ نقشبندی ،قادری رحمۃ اللہ علیہ)